O PSOE de Ribeira, a través do seu concelleiro José Manuel Suárez-Puerta Sirgado, vén de presentar unha proposta para ser tratada no pleno relativa ás pistas polideportivas e o parque infantil de Deán, que se ben presenta un estado aceptábel no que se refire aos elementos de xogo (que foron renovados dende a súa inauguración), ten, segundo indican os socialistas, determinadas eivas nas diferentes partes e estruturas da pista deportiva, “que presentan un estado de deterioro e abandono que fan non xa complicado senón mesmo perigoso o seu uso”, explican.
No comunicado sinalan que “os aramados que constitúen o peche perimetral da pista atópanse soltos e nalgúns lugares rotos, co perigo de que alguén se enganche con elas e resulte ferido”. Amais, din, “os postes do peche perimetral atópanse vencidos, coa pintura esconchada e enferruxados, amais de soltos na súa base, con risco de esborralle e suxeitos soamente polo aramado do devandito peche”.
Por outra banda, a agrupación explica que “as portarías atópanse soltas, sen ancorar ao chan, co que a posibilidade de caída sobre un menor é un perigo evidente, coa posibilidade de que un feito como ese finalice en traxedia, como ocorreu noutros lugares”.
Por todo o devandito, piden o seguinte:
-“Que se realice a completa substitución do peche perimetral da pista polideportiva, realizándose esta con materiais que resulten mais acordes cos tempos actuais e que proporcionen á contorna un aspecto máis agradábel”.
-“Que se proceda á fixación dos elementos da pista polideportiva (porterías) de maneira que deixen de constituír un perigo potencial, así como ao repintado da pista incluíndo neste a zona adicada ao baloncesto”.
-“Que se proceda a humanizar e recuperar a contorna da fonte, que nestes momentos presenta un estado de deixamento e abandono que a converte en practicamente inutilizábel, sendo, como é, un espazo natural que poderían utilizar os veciños e visitantes”.
