O Tribunal Superior de Xustiza de Galicia (TSXG) rexeitou a demanda interposta por Naviera de las Rías Gallegas na que impugnaba a aprobación do Plan Reitor de Uso e Xestión do Parque Nacional Marítimo-Terrestre das Illas Atlánticas de Galicia, publicado no Diario Oficial de Galicia en febreiro de 2019. Os maxistrados apoian tanto a forma como o procedemento seguido pola Xunta de Galicia na tramitación do documento. Na sentenza tamén avalan, en contra do criterio da parte demandante, que o director-conservador do parque nacional expida autorizacións para o acceso de grupos organizados, así como para o desenvolvemento de actividades de navegación, fondeo, amarre e atracada das embarcacións no parque nacional.
Os maxistrados destacan na resolución, contra a que cabe presentar recurso de casación, que o plan “xa advirte que no cómputo dos visitantes quedan excluídos os veciños das illas, o persoal adscrito ao parque nacional, os traballadores dos establecementos legalmente establecidos e o persoal de entidades públicas ou privadas que desenvolven no parque labores de restauración, mantemento, instalación e investigación debidamente autorizadas polo parque nacional”.
