O Rotogal Boiro Voleibol demostrou esta tarde que será un óso moi duro de roer esta tempada, e máis na fortaleza da Cachada. Os de Marcelo Benavídez espremeron ao Teruel, que necesitou sacar a súa mellor versión no quinto set para facerse co triunfo por 2-3. Os locais tutearon a un rival que é un dos aspirantes ao título da Superliga e que
tivo en Andrés Villena ao seu principal expoñente ofensivo con 30 puntos.
O Rotogal Boiro Voleibol iniciou o encontro cun xogo de moi alto nivel. Tanto é así que, grazas ás prestacións na recepción e no ataque, puxeron contra as cordas ao Teruel e alcanzaron o tramo final do primeiro set cunha vantaxe de 24-22. Con todo, os locais non foron capaces de pechar o parcial e, tras encaixar un 0-4, viron como se esfumaba a opción de tomar a dianteira.
No segundo set, o Rotogal Boiro Voleibol pagou o castigo sufrido no tramo final do primeiro e non puido manter o nivel #ante un Teruel que encarrilou o choque (21-25). Con todo, o escenario cambiou na terceira manga. Os aragoneses desaproveitaron dúas bólas de partido e os locais, cunhas excelentes prestacións no bloqueo-defensa, agarráronse ao partido (29-27).
O Rotogal Boiro Voleibol empregouse con comodidade no cuarto set, no que foi superior ao conxunto visitante (25-20). Todo quedou abocado a un decisivo quinto parcial. No tramo definitivo, o Teruel minimizou erros e elevou o acerto no saque, mentres que os locais precipitáronse nalgunhas accións crave e viron como a posibilidade de dar a badalada na fortaleza A Cachada se esfumaba (10-15).
Rotogal Boiro Voleibol, 2: Gaby del Carmen, Mario Iglesias,José Carlos Romero, Felipe Benavídez,
Renan Levandoski, Gaspar Bitar e Adrián Alves (líbero). Tamén xogaron Pablo Nieto, Cristóbal
Álvarez, Alan Davila e Iván Souto.
Voleibol Teruel, 3: Joaquín Monteagudo, Jukoski, Greg Petty, Pablo Bugallo, Andrés Villena,
Mariano Vildosola e Aarón Gámiz (líbero). Tamén xogaron Jovanovic, Dimitrov y Kobzev.
Sets: 0-1 (24-26), 0-2 (21-25), 1-2 (29-27), 2-2 (25-20) e 2-3 (10-15).
Árbitro: Alberto Robles e Jesús Antonio Soria.
Incidencias: Partido disputado en A Cachada ante uns 300 espectadores.
