Os socialistas de Ribeira, a través do seu concelleiro José Manuel Vilas, presentou un rogo para ser debatido en pleno relativo ao peirao de Castiñeiras, que, segundo sinala a agrupación, precisa dun acondicionamento nas varandas de protección. O PSOE pon o foco nos elementos do espigón portuario, que “presentan un deterioro alarmante, con risco de caer a cachos, e o que é peor, con risco de que poidan ocasionar feridas ou accidentes aos traballadores portuarios ou viandantes no contacto directo”.
Os socialistas engaden que “a falta de mantemento neste treito, se cadra debido ao esquecemento e coa axuda do vento do nordés, fixo que o óxido corroera o material da varanda, observándose descalzada e esconchada”.
En virtude de todo o devandito, a agrupación solicita o seguinte:
– Que comunique decontado a Portos de Galicia esta anomalía na infraestrutura de protección do peirao de Castiñeiras, que pode ser causa dun desgusto en calquera instante.
– Que se proceda ao recambio da varanda enferruxada, para así poder dotar ao porto de Castiñeiras dunha instalación necesaria para o desenvolvemento da actividade portuaria, e tamén que o lugar poda ser utilizado axeitadamente, e con seguridade polos mariñeiros.
