O PP di que as obras de Ponte Nafonso respectan “ao máximo” o patrimonio cultural

O Partido Popular de Galicia, a través da deputada Ana Belén García, achegou a súa postura sobre as obras de restauración que se están a levar a cabo na Ponte Nafonso, sobranceira construción histórica sobre o Tambre compartida polos concellos de Noia e Outes. Segundo fixo saber a deputada nunha intervención no Parlamento, estes traballos “respectan ao máximo o patrimonio cultural” e “servirán non só para poñelo en valor, senón que mellorarán a seguridade viaria”.

Ana Belén García explicou que a obra de reparación e posta en valor da ponte Nafonso está enmarcada no programa de control das pontes e obras de paso que está a desenvolver a Xunta, co fin de preservar a seguridade e alongar a vida útil destas infraestruturas. Esta actuación, dixo, suporá un investimento superior aos 700.000 euros e “permitirá poñer en valor esta ponte desde o punto de vista patrimonial, así como unha mellora da seguridade viaria de vehículos e, especialmente, peóns”.

En concreto, dixo,”a actuación que se está a desenvolver inclúe a retirada do pavimento de aglomerado bituminoso existente e substitución por un novo firme de lastro de granito; a retirada da vella barreira metálica e colocación dunha nova; limpeza dos paramentos exteriores da ponte; e novo alumeado da calzada e da estrutura da ponte”.