O salón de plenos do Concello de Noia acolleu este martes 26 de outubro a presentación do acordo de colaboración entre as entidades Noia Portus Apostoli FS, Asociación Misela e A Creba Saúde Mental, a través do cal o dito club deportivo compartirá as vivencias do fútbol sala con ambas asociacións locais.
Segundo sinalaron, a cooperación estenderase durante todo o curso escolar e os integrantes das dúas asociacións recibirán clases semanais de fútbol sala. Amais, poderán compartir vivencias e experiencias con xogadores e técnicos do equipo noiés, arestora en segunda división. No acto estiveron presentes Laura Salgado, concelleira de Deportes, Javier Barreiro, Director Xeral do Noia FS, e as coordinadoras de A Misela e A Creba, Oliva Filgueira e Covadonga Rodríguez.
