A Área de Cultura do Concello de Rianxo vén de informar da participación activa do Concello na vindeira edición do Seminario sobre a Memoria, a undécima edición, que se celebra os días 5, 6 e 7 de novembro nas localidades de Rianxo, Cuntis e Cerdedo. Contarase coa presenza de Xosé Manuel Malheiro Gutiérrez (O documental como recurso para o estudo da memoria), Héctor Picallo Fuentes (Represión, morte e resistencia na terra das Augas Quentes), Marcos Seixo Pastor (Roberto Blanco Torres, “Orballo da media noite”, detido, paseado e fusilado en 1936), Susana Sánchez Aríns (O home que sacaba aos homes das casas), e Calros Solla Varela e Fernando Salgado (O Campo das Laudas, un proxecto de recuperación da memoria histórica de Cerdedo).
Segundo informan dende Nova Escola Galega, impulsora principal do seminario, a convocatoria constitúe, globalmente, unha proposta para a reconstrución da memoria histórica no contexto escolar, sendo o obxectivo suxerir aos asistentes unha reflexión sobre o fenómeno da represión sobre a desapiadada depuración sufrida pola poboación. Amais, perséguese achegar un mellor coñecemento “do noso pasado máis recente e provocar tamén que a actualización dos coñecementos sobre os temas abordados nesta edición contribúa, no alumnado indirectamente beneficiario da reflexión, á comprensión do presente e á adopción dunha actitude responsábel e solidaria na defensa da liberdade, da democracia e da xustiza”.
