A portavoz de Pesca do BNG, a pobrense Rosana Pérez, formulou unha pregunta ao Goberno sobre as axudas ás mariscadoras para paliar os efectos dos temporais no mes de febreiro. A parlamentaria nacionalista sinalou que as afectados e afectados solicitaron á Consellería a habilitación de axudas directas para o sector, “axudas que aínda están agardando, ao que se sumou a crise polo impacto da COVID tras un de peche da hostalaría”, dixo, engadindo que “mentres se producía esta situación, a Consellaría do Mar publicaba nos medios de comunicación titulares de apoio directo ao sector con contías concretas de dous millóns de euros”. Neste sentido, Rosana Pérez, preguntou á directora xeral de Desenvolvemento pesqueiro, “se as axudas foron suficientes” e “que cantidade dos 2 millóns de euros foi executada”. Asemade, a nacionalista tamén se interesou polas medidas da Consellería ante “os problemas detectados no inicio da campaña”.
Rosana Pérez explicou que os temporais de principios de ano afectaron á actividade marisqueira e zonas entre as que destacou: Abanqueiro, Cabo de Cruz, Vilaboa, Rianxo, Camariñas, Noia, Pontevedra, e Vilagarcía.
Pola súa parte, a Directora Xeral de Desenvolvemento Pesqueiro, Susana Rodríguez Carballo, afirmou que existen 59 proxectos aprobados de 1,5 millóns de euros para a rexeneración marisqueira ao que a parlamentaria do BNG preguntou “cantos foron presentados porque despois da experiencia das axudas para o marisqueo pola COVID, o sector está moi escaldado despois de seren rexeitadas máis de mil solicitudes”.