O Concello de Ribeira vén de informar dun importante aumento da actividade no Viveiro de Empresas Municipal, que vén de sumar nas últimas semanas dúas novas incorporacións. Trátase de dous gabinetes de psicoloxía que se acaban de implantar nesta infraestrutura destinada a facilitar o labor daqueles emprendedores que se animan a lanzar un negocio.
De feito, segundo explica o Servizo Municipal de Orientación Laboral radicado no edificio do Viveiro, nos últimos tempos “estase a percibir un repunte no número de persoas que se mostran interesadas en coñecer o seu funcionamento e valorar ocupar un despacho”.
O Viveiro ofrece entre outros servizos oficinas individuais, unha sala de reunións e outra de usos múltiples, amais dun servizo permanente de formación e asesoramento. O Concello lembra que aquelas persoas emprendedoras que sintan interese poden pórse en contacto co devandito Servizo de Orientación Laboral a través do teléfono 98 771 497 ou ben acudindo presencialmente ao Viveiro.
Dende a súa apertura xa pasaron novos profesionais pertencentes a sectores como a consultoría, os idiomas, a imaxe e son, a xestión deportiva, a nutrición, a tecnoloxía ou o mercadotecnia dixital.
