Este venres 22 de outubro vaise celebrar no salón de actos da Sociedade Liceo de Noia a clausura do programa EcoNoia, impulsado pola Confraría de Pescadores San Bartolomé e a marca colectiva Berberecho de Noia para impulsar e reivindicar o marisqueo e a pesca sustentábel (que non son outros que os relacionados coa tradición pesqueira e marisqueira da nosa comarca) e para sensibilizar ao sector e á sociedade acerca de necesidade de coidar o medio mariño. Na cita tamén se presentarán os detalles da segunda parte do proxecto, EcoNoia II. Contarase coa presenza da directora xeral de Desenvolvemento Pesqueiro, Susana Rodríguez Carballo, e representantes dos Concellos de Noia e Outes.
Máis datos da iniciativa
O proxecto EcoNoia, abeirado ao programa Mar Limpo da Consellería do Mar, é unha acción de Responsabilidade Social Corporativa (RSE) da Confraría de Pescadores de Noia. Un dos seus grandes obxectivos é retirar o lixo acumulado nos bancos marisqueiros e divulgar e concienciar sobre o impacto ambiental do lixo mariño. É unha excelente oportunidade para fomentar valores sustentábeis e ecolóxicos tanto individuais como colectivos, poñendo o foco na importancia económica futura de todo o que se faga hoxe a prol do medio ambiente mariño.
