En Lousame o Concello mellor os accesos a Abelendo e o camiño da Barreira a Guiende

O Concello de Lousame vén de investir 30.000 euros na mellora dos accesos ao núcleo de Abelendo e no pavimentado do camiño da Barreira a Guiende (na parroquia de Tállara). As obras son executadas pola empresa Excavaciones Yoni Tuñas SL ao abeiro do Plan Único de Concellos POS+ 2021.

As obras consistiron na mellora dos accesos a Abelendo dende a DP-1105 Boiro-Noia, onde foron reparadas as fochancas e melloráronse dous treitos con aglomerado en quente, con 75 metros cadrados de sobreanchos. Así mesmo, pavimentáronse outros dous treitos no interior da localidade, previa demolición do chan existente.

A maiores, pavimentouse con triplo tratamento asfáltico un camiño de 350 metros que une as localidades da Barreira e Guiende, onde se executou un abanico de 15×5 metros. Así mesmo, o Concello de Lousame está a executar nestes días outra actuación máis na aldea de Guiende, onde se comezou coa demolición do pavimento existente en tres treitos da aldea e onde se procederá ao seu pavimentado con cinco centímetros de saburra (zahorra) e doce de formigón nunha superficie de 1.035 metros cadrados. Unha obra orzamentada en máis de 20.000 euros e que está sendo executada pola empresa Construcciones y Obras Andújar SL.