Dores Torrado e Carlos Muñiz incorporanse ao Goberno local de Boiro

Este mércores fíxose oficial a incorporación ao goberno local do Concello de Boiro, presidido por José Ramón Romero García, de Carlos Muñiz e Dores Torrado. Nunha rolda de prensa celebrada esta tarde o alcalde, José Ramón Romero, e os dous concelleiros que pasan a formar parte do goberno local expuxeron os motivos que os levou a firmar este pacto de gobernabilidade.
Con esta nova designación de delegacións, o alcalde, José Ramón Romero García, terá as delegacións de Representación Institucional, Seguridade e Orde Público e Participación Cidadá; Luís Ruiz, Urbanismo, Obras e Servizos, Economía e Facenda; María Outeiral terá Cultura, Ensino, Persoal e Patrimonio; Marcos Fajardo terá Comercio, Consumo, Alumeados, Cemiterios, Limpeza Viaria e Recollida de Lixo; Raúl Treus terá as delegacións de Servicios Sociais, Medio Ambiente e Administración Xeral; Dores Torrado terá Deportes, Mocidade, Feminismo e Igualdade, Lingua e Memoria Histórica; Carlos Muñiz terá Desenvolvemento e Promoción Económica e Turismo.
Este acordo xorde dunha posta común das distintas forzas políticas para elaborar un programa de obxectivos que levar a cabo no que resta de lexislatura, entre os que se atopan a aprobación do orzamento municipal; o proxecto para a construción do vial de Berres; elaboración dun plan de mobilidade sostible; a modernización da recollida de lixo; ou a optimización do consumo enerxético.
Carlos Muñiz anunciou, durante a rolda de prensa, a súa marcha do grupo municipal Ciudadanos para poder formar parte deste acordo de goberno co “compromiso firme de servir a Boiro e apoiar todas aquelas iniciativas que
beneficien á veciñanza e que son necesarias para o noso concello”. Dores Torrado anunciou os motivos que levaron ao seu grupo a formar parte do acordo que se asina. “O día de hoxe ten que supoñer un punto de inflexión de cara a conseguir unha estabilidade política para levar a cabo os proxectos que Boiro necesita”.
O alcalde, José Ramón Romero, anunciou o compromiso que se oficializou este mércores para que o pobo de Boiro siga avanzando xa que “os veciños de Boiro teñen que estar por encima de todo”. “Este é o resultado das negociacións e traballo que as distintas forzas políticas do municipio para quitar a Boiro do bloqueo político”, recoñeceu o alcalde.
Este acordo de gobernabilidade do Concello de Boiro parte do compromiso do traballo conxunto, por encima dos intereses partidistas, para levar a cabo proxectos e iniciativas en beneficio da veciñanza.