O Concello de Rianxo e a Deputación da Coruña (a través da súa Rede Cultural) van traer ao Auditorio Municipal da vila, o 30 de outubro ás 20.30 horas, a obra Bernarda (Vilalba 1975), espectáculo da compañía Malasombra Producións baseado no texto orixinal de Jose Prieto, que tamén é director da adaptación teatral. A entrada desta representación (para maiores de 14 anos) é de balde, e pódese reservar a través da web do Concello.
O elenco está integrado por Celia González, Luisa Merelas e Esther Aja.
Bernarda, cualificada pola compañía como “un drama con humor para público adulto” é unha obra de 75 minutos que relata a vida das dúas fillas xemelgas dunha muller chamada Bernarda, que fica viúva o mesmo día en que morre o ditador Franco. Bernarda, ante este panorama de dupla desgraza, decreta o estado de loito.
