P.P. Esta finde semana os dous equipos barbanzás da Preferente teñen unha oportunidade inmellorable para vencer e tratar de convencer. Tanto Boiro como Puebla aínda non puideron saborear os tres puntos neste comezo de liga logo das tres primeiras xornadas. O calendario quixo deparar que este domingo tanto boirenses como pobrenses se enfronten a dous rivais a priori asequibles para conseguir a primeira vitoria da tempada e recuperar as sensacións da pretempada.
Por un lado, os de Luis Carro visitan a un Xallas que este ano loitará pola permanencia. Aínda que se sitúa con tres puntos no casilleiro e porriba dos boirenses, os de Santa Comba contan cun plantel moi xusto e a única vitoria conseguírona fronte ao Vista Alegre, outro dos equipos frouxos da categoría. O CD Boiro visitará a Fontenla o próximo domingo a partir das 17:30 horas co obxectivo de traer os primeiros tres puntos para a casa e afrontar os vindeiros encontros con maior tranquilidade.
Doutra banda, o Puebla recibirá na Alta ao Vista Alegre Estudiantil, un equipo refundado a tempada pasada e que partiu en Terceira División, e desecendeu, e este ano tivo moitos problemas para confeccionar o plantel. A xornada pasada acudiron ao partido con tan só dous recambios no banquillo. Atópase na última posición con 0 puntos, 0 goles a favor e 6 en contra, un rival idóneo para que o Puebla consiga seu primeiro triunfo da tempada e comece a respirar. O encontro disputarase o domingo a partir das 17:00 horas na Alta.
