Este venres 22 de outubro temos en Boiro unha cita co mellor teatro galego da man da compañía Malasombra Producións, que representará a peza Bernarda (no marco da programación da Rede Galega de Teatros e Auditorios) na Casa da Cultura a partir das 21.00 horas. O prezo das entradas é de 3,5 euros e poden mercarse no mesmo día da función a partir das 19.00 horas.
Bernarda é un espectáculo baseado no texto orixinal de Jose Prieto, que tamén é director da adaptación teatral. O elenco está integrado por Celia González, Luisa Merelas e Esther Aja.
Bernarda, cualificada pola compañía como “un drama con humor para público adulto” é unha obra de 75 minutos que relata a vida das dúas fillas xemelgas dunha muller chamada Bernarda, que fica viúva o mesmo día en que morre o ditador Franco. Bernarda, ante este panorama de dupla desgraza, decreta o estado de loito.
