O Consistorio de Rianxo acolleu este 15 de outubro unha xuntanza entre o delegado da Xunta na Coruña, Gonzalo Trenor, e os representantes da Mancomunidade Arousa Norte, que preside arestora o rexedor rianxeiro, Adolfo Muíños. No encontro o representante do Goberno galego informou do recente convenio asinado con esta mancomunidade que contempla un investimento de 48.000 euros para a subvención de actividades relacionadas coa promoción, a dinamización e o fomento do turismo. Pola súa banda, os catro concellos tamén levará na cabo unha contribución de 12.000 euros.
Trenor destacou que “este apoio económico permitirá a promoción do turismo náutico e gastronómico dos concellos”. Segundo concertou, no eido do turismo marítimo apoiarase a creación dun equipamento dunha rede de bases náuticas e no eido gastronómico promocionarase a marca A Conserva a Orixe e a organización do evento Barbanza Arousa+Que Tapas.
O convenio tamén contempla a posta en valor do itinerario xacobeo que pasa pola nosa comarca: O Camiño do Barbanza (A Orixe).
Ademais, o acordo inclúe a proposta de elaboración dun produto turístico de calidade para a nosa contorna, a creación dun banco fotográfico e a asistencia a feiras turísticas.
O delegado da Xunta subliñou que “Arousa Norte é un dos destinos galegos que se caracteriza pola súa implicación e esforzo no desenvolvemento de produtos turísticos innovadores”. E engadiu que para “continuar traballando neste liña, o convenio de colaboración que hoxe se presentou establece as bases para a subvención de actividades para seguir colocando esta zona entre os principais destinos turísticos entre os visitantes que se achegan a Galicia”.
Na xuntanza tamén participaron María Barreiro, xefa territorial, Xosé Lois Piñeiro, alcalde da Pobra do Caramiñal, María José Sampedro, tenente alcalde de Ribeira, Carlos Rodríguez, concelleiro de turismo de Boiro e Fátima Cachafeiro, xerente da mancomunidade.
O acordo, amais de nas devanditas actuacións, céntrase na promoción turística comarcal realizando diferentes pezas de posicionamento do Camiño de Santiago, como é unha guía e un audiovisual e tamén na comercialización, mediante a creación de 65 paquetes turísticos que se posicionarán en axencias nacionais e internacionais. Con estas actuacións e outras que se están levando a cabo preténdese visualizar Barbanza como “un destino de primeira orde e o traballo pola calidade e a competitividade do sector”.
