Ambar achegará á mocidade formación laboral para os sectores alimentario e agrario

Este venres 15 de outubro, a Asociación Ambar recibiu a resolución da convocatoria de axudas para iniciativas a prol da empregabilidade das persoas novas con capacidades diversas, achegadas pola Fundación ONCE a través da iniciativa Uno a Uno. Esta convocatoria ten como obxectivo contribuír á inserción sociolaboral de menores de 30 anos a través de programas de formación.

Ambar impartirá dúas formacións:

• Unha formación no sector da industria alimentaria: Operacións auxiliares de elaboración na industria alimentaria de 340 horas (220h de formación teórica e 120h de formación práctica na empresa). Estimase que o curso dará comezo no mes de novembro e finalizará a finais de abril do 2022.

• Unha formación no sector agrario: Actividades auxiliares en aproveitamentos forestais de 320 horas (200h de formación teórica e 120h de formación práctica na empresa). Estimase que o curso comezará en decembro e finalizará en maio de 2022.

Ambar explica que grazas a dotación económica subvencionada pola Fundación ONCE poderán asumirse os custes de contratación de persoal, material formativo, seguros, becas, gastos derivados da instalación, desprazamentos a empresas e gastos de xestión.

Respecto da formación que ten a data de inicio máis próxima, Operacións auxiliares de elaboración na industria alimentaria, está destinada a ocupación de persoal de almacén, carretilleiro ou carretilleira, auxiliares e operarios da industria alimentaria. Como dixemos, estímase que comezará no mes de novembro de 2021 e rematará en abril do 2022. Realizarase de maneira presencial nas instalacións coas que conta a Asociación Ambar en Ribeira (Frións/San Roque). O curso contará cunha fase teoría e outra práctica dun total de 340 horas. As persoas interesadas poden solicitar dende xa máis información a través de empregoinclusivo@asociacionambar.org ou formalizar a súa inscrición chamando directamente ó 981 87 44 80.