A Policía Nacional detén en Ribeira a unha muller por un delito de estafa

Axentes da Policía Nacional adscritos á Comisaría de Ribeira, procederon á detención dunha muller de 45 anos de idade, veciña de Ribeira, como presunta autora dun delito de estafa.

Fontes da Comisaría explicaron que “tras unha laboriosa e ardua investigación” procedeuse á localización e detención dunha muller que desempeñando o seu traballo como coidadora do fogar, tras gañarse a confianza da súa empregadora e usando para iso a tarxeta bancaria desta, realizou numerosos cargos non autorizados ao seu favor, ascendendo o total do defraudado a 51.280,46 euros.

Tras tramitarse as correspondentes dilixencias policiais, a detida é posta a disposición do Xulgado de Instrución número Dous de Ribeira, en funcións de garda.