A Asociación Amicos celebrou este 29 de outubro a Festa do Samaín no seu Centro Integral de Comoxo, en Boiro. Previamente, ao longo desta semana, as e os integrantes da entidade social da nosa comarca mostraron a súa total implicación creativa preparando os disfraces máis terroríficos e decorando o centro. As paredes enchéronse de arañeiras, pinturas e até houbo un photocall con máscaras e demais complementos para deixalo todo a punto para o gran día: este venres 29.
A celebración estendeuse ao longo da mañá con diversas actividades. A primeira hora os membros de Amicos estiveron a traballar na maquillaxe e dando os últimos toques a cadanseu disfrace, para máis tarde facer “un desfile de medo” onde os demos, os espíritos e outros seres da ultratumba foron os protagonistas.
Ademais, a comunidade de Amicos participou nun scape room do terror que incluía varias probas como a construción dun quebracabezas, un xogo para dar cunhas chaves perdidas e unha proposta para descifrar mensaxes ocultas e atopar un obxecto perdido no caldeiro dunha bruxa.
A festa non rematou na xornada deste venres 19. A segunda parte do Samaín está prevista para o vindeiro martes, 2 de novembro, no Centro de Educación Especial de Amicos, situado en Oleiros (Ribeira). A actividade principal será a realización dun concurso de cabazas de Samaín.
