Esta semana remataron en Boiro as actividades formativas do programa municipal de emprego (PIE), edición 2020-2021. Fixérono co desenvolvemento dos módulos de aprovisionamento, preelaboración, conservación e elaboración culinaria que se desenvolveron dentro do Certificado de Profesionalidade de Operacións Básicas de Cociña.
As participantes adquiriron coñecementos para realizar elaboración culinarias, pratos combinados, aperitivos, fornecemento de materia prima a conservación alimentaria. O Concello fixo saber que “todas as participantes estanse a incorporar a diferentes empresas do Barbanza para realizar 80 horas presenciais do módulo de prácticas profesionais”.
Toda a formación do curso impartiuse no Centro de Formación e Viveiro de Empresas que o Concello de Boiro ten no Polígono Industrial de Espiñeira, acreditado para impartir formación vinculara a certificados de profesionalidade.
O Programa Integrado de Emprego do Concello de Boiro está dirixido exclusivamente a mulleres e subvencionado pola Consellería de Emprego e Igualdade da Xunta de Galicia e o servizo Público de Emprego Estatal.