Porto do Son reivindicou os mares limpos cunha gran xornada de recollida de plásticos en Aguieira

O sábado 4 de setembro tocou baixar á praia a prol do medio ambiente. Concretamente á praia de Aguieira, en Porto do Son, onde se desenvolveu unha Xornada de Concienciación Ambiental que contou coa presenza activa do deportista olímpico local Iago López Marra (un vello coñecido deste tipo de actividades de activismo e sensibilización, principalmente na praia de Coira, en Portosín) e dos tamén olímpicos Kahena Kunze e Jordi Xammar (medallistas os dous nos Xogos de Toquio), cuxa participación non só fixo posíbel unha meirande e máis diversa implicación de residentes e visitantes, senón que lle deu un extra visualizador nos medios e un maior potencial de sensibilización. A xornada veu da man da Concellería de Medio Ambiente de Porto do Son, en colaboración coa Real Club Náutico de Portosín, a Confraría de Portosín e máis a Escola de Surf As Dunas.

A xornada enmarcouse na campaña Infinitamente Natural, iniciada co arrinque do verán.

Iago López Marra explicou que “temos a gran sorte de viaxar por todo o mundo e ver a cantidade de lixo que se deposita en terra que ao final acaba no mar. É un tema que nos preocupa moito, porque o mundo que temos é un e non hai máis opcións. Estamos moi comprometidos con iso e tratamos de facer ver ás novas xeracións que o importante está por vir e que temos que coidar o medio ambiente e tratar de utilizar menos, que é o gran problema hoxe en día”.

Na xornada participaron ducias e voluntarias e voluntarios ambientais procedentes de todos os recantos do concello e de Galicia, principalmente. Para desenvolver o seu importante labor puxéronse a camiseta coa lenda Infinitamente natural, que o lema impulsado polo Concello para reivindicar os seus tesouros ambientais e, tamén, a importancia de coidalos e estender este coidado a toda a riqueza natural do planeta.