O Auditorio do Museo Valle-Inclán da Pobra do Caramiñal vai dar acollida este 1 de outubro á presentación do libro Don Carlos e o misterio dos lucecús, da escritora sonense Patricia Torrado Queiruga. O acto, que dará comezo ás 20.00 horas, desenvolverase en colaboración con Baía Edicións e a Asociación Cultural Barbantia.
Ademais da propia autora, intervirán a concelleira da Cultura, Patricia Lojo (PSdeG-PSOE), a escritora Fina Casalderrey e a editora Belén López.
As prazas cubriranse pola orde de chegada ata completar a cabida e seguiranse as medidas implantadas por mor da COVID-19.
Argumento (Baía Edicións)
Na vila comezan a xurdir sucesos inexplicábeis e, por se fose pouco, na casa contáronlles que o seu profesor, o único que os podería axudar a buscar unha explicación a tanto misterio, padece unha enfermidade que lle fai esquecer as cousas.
Xiana, Maca, Román, Sofía e Afonso convídante a desentrañar cada misterio coa axuda de don Carlos. Unhas pescudas que vos levarán a valorar o lugar no que vivides, o medio ambiente, as tradicións, o amor e os prexuízos cos que podemos atoparnos todos os días. Acompáñasnos?
