P.P.- Facerse forte no Julio Mato, esa é o principal obxectivo deste Noia que loitará por quedarse un ano máis na Terceira División. De momento, tres xornadas, 4 puntos, un bo balance, pero con sabor amargo logo de saír derrotados diante da súa xente na segunda xornada fronte ao Fabril por 0-3.
Agora buscarán deixar os tres puntos na casa fronte ao Xuvenil Ponteareas, un rival que non coñece a derrota e marcha cuarto na clasificación. Os de Iván Carril veñen de empatar a pasada xornada contra o Sofán no Carral, nun partido moi disputado que puido caer para calquera dos dous lados.
O Ponteareas pola súa parte gañou ao Vilalbés por 2 goles a 0. Os noieses tentarán multiplicar as súas opcións a través do dominio de balón e o Ponteareas, aínda que tamén pode ter o balón, caracterízase polas rápidas transicións en ataque.
O primeiro triunfo como locais pasa polo Julio Mato o domingo a partir das 18:00. Espérase unha moi boa entrada no estadio por parte dos afeccionados do FC Noia.
