PP.- O Noia e o Sofán firmaron táboas na terceira xornada da Terceira División. Os de Iván Carril foron mellores durante gran parte do encontro e adiantáronse antes de chegar ao descanso, pero a falta de 20 minutos os locais poñerían o definitivo 1-1 no marcador nun duelo con alternativas. O empate é un resultado xusto para o visto sobre o terreo de xogo.
Arrancaba o encontro no Carral entre o Sofán e o Noia, que a pesares de ser a xornada 3, situábase como un encontro clave para o futuro da competición e na loita pola permanencia. Os primeiros minutos foron de continuas imprecisións, xogo directo e moita loita no centro do campo, en gran parte condicionado polas dimensións do terreo de xogo. Aínda así, o Noia, acostumado a ter máis o balón e apostar por un estilo máis combinativo, gozou das mellores ocasións para adiantarse, e a piques de chegar ao descanso, no minuto 36, logo dunha gran xogada entre Pablo Carro, Prol e Hugo García, Jesús Sayés rematou á rede para bater a Julián e poñer o 0-1, resultado co que se chegaría ao descanso.
Xa na segunda metade, o Sofán mellorou e foi moito máis vertical, e logo dun par de ocasións, Paulo aproveitaría un centro desde a dereita para poñer o definitivo 1-1 no marcador. Iván Carril moveu o banquillo coa entrada de Anxo, Tato e Ferreiro, pero o marcador non se movería.
A vindeira xornada, o Noia recibe ao Ponteareas que vén de realizar un espectacular arranque ligueiro ao sumar 7 puntos dos 9 posibles.
