A voceira de Medio Ambiente do grupo Socialista, Paloma Castro, e a deputada Noa Díaz, veñen de presentar unha batería de iniciativas no Parlamento de Galicia para esixir á Xunta o seu compromiso co futuro do Complexo de Tratamento de Residuos Sólidos Urbanos (RSU) da Mancomunidade de concellos da Serra do Barbanza (Lousame, Noia, Porto do Son, Muros, Carnota e Brión), unha entidade cuxa concesión remata o vindeiro 2023. A través desta proposta quérese que a Xunta garanta a continuidade da planta, dos postos de traballo e do modelo que representa en materia de tratamento de lixo (un modelo directamente encamiñado á reciclaxe, non á incineración).
Paloma Castro lembra que “o PSdG sempre apostou por esta planta, poñendo en valor o emprego que xera na comarca e a reciclaxe en proximidade, menos contaminante que outras plantas que operan en Galicia”. Nesta liña, puxo en valor que “na actualidade a taxa de reciclaxe dos municipios asociados a Lousame é de 17 quilos por habitante e por ano, o que supón 5 puntos por riba da taxa galega”.
En contraposición a estas cifras, Paloma Castro denunciou o “claro incumprimento por parte do goberno galego dos obxectivos do Plan de Xestión de Residuos Urbanos de Galicia (2011-2022)”. Ese plan, dixo, “establece entre os seus obxectivos impulsar a xestión de residuos domésticos en Galicia cara a un escenario máis sustentábel, mediante a creación de 11 plantas de proximidade ao longo de todo o territorio”. Segundo comentou, “a día de hoxe só hai 3 proxectadas, e unha funcionando no complexo de SOGAMA”.
Paloma Castro sostén que o goberno da Xunta “ten que mudar a súa política negativa e de confrontación fronte a Lousame e colaborar no impulso desta planta para facilitar a súa continuidade”. Desta maneira, conclúe, “tamén se avanzará na necesidade de cumprir no ano 2023 as esixencias da UE de acadar o 50% de reciclaxe de materia orgánica”.
