O Concello de Dodro celebra o XXXIV Premio de Poesía Eusebio Lorenzo Baleirón 2021, un dos certames literarios máis antigos da nosa lingua, cuxo obxectivo é honrar a memoria do poeta Eusebio Lorenzo Baleirón- natural de Dodro- e contribuír á reafirmación da lírica e cultura galega. O Concello lembra que “anualmente convoca un número importante de autores/as consagrados/as das nosas letras e de poetas emerxentes”.
O premio está dotado con 2.500 euros e o Concello de Dodro comprométese, ademais, a publicar a obra gañadora dentro do ano 2022, nunha editorial de recoñecido prestixio.
As bases para participar neste certame foron publicadas no Boletín Oficial da Provincia da Coruña núm. 125, do martes 6 de xullo de 2021 e están dispoñibles para consulta na páxina web municipal.
O prazo de presentación das obras candidatas remata o vindeiro 8 de outubro.
Posteriormente daranse a coñecer publicamente as persoas, de recoñecida obxectividade e competencia no xénero da poesía e na critica literaria, que compoñen o xurado nesta edición.
A elección do poemario gañador terá lugar o 6 de novembro e o acto de entrega, oficial, do premio celebrarase o día 11 de decembro, no CPI Eusebio Lorenzo Baleirón.
