O BNG mostrou nun comunicado o seu apoio ás reivindicacións da comunidade escolar de Ribeira, nomeadamente ás ANPAs e ao profesorado dos centros afectados polos recortes de Educación. Segundo fai saber o concelleiro de Ribeira Luis Pérez Barral “é imprescindíbel que haxa o mesmo número de docentes que no curso 2020-2021, que a Consellería de Educación, cando menos, manteña os mesmos desdobres autorizados en todos os niveis educativos o curso pasado e que se reforcen os cadros de persoais para reducir as proporcións máximas por aula”.
Pérez Barral denunciou que mentres os centros públicos “teñen cada vez menos recursos”, e “desde que goberna o PP incrementouse nun 5,5% o profesorado do ensino privado e reduciuse en case un 5% o profesorado do público”. Sobre o presente curso, asegurou que 2en Ribeira imos padecer o brutal recorte de 11 profesores no IES Nº1, a redución de dúas unidades no colexio de Palmeira e o recorte dun profesor no colexio de Aguiño, ao que cómpre engadir que no colexio de Artes hai vacantes que non se cobren”.
Ao se parecer, “as consecuencias dos recortes van a ter graves implicacións pois provocará unha perda importante de calidade educativa, aumentan as proporcións con aulas masificadas, pérdense agrupamentos, redúcese a atención á mocidade á diversidade e á rapazada con dificultades e mesmo existe unha redución das materias optativas”.
O BNG criticou tamén ao alcalde de Ribeira, Manuel Ruiz, porque consideran que non sumou a súa voz ás reivindicacións contra os recortes, polo que lle piden “que, como máximo responsábel do Concello, ten a obriga defender os intereses da veciñanza de Ribeira por riba dos intereses do Partido Popular”. E engaden: “Preguntámonos que é o que fixo a concelleira de Educación até o momento para defender os centros educativos do concello de Ribeira, porque non temos constancia de que en ningún momento saíse publicamente a apoiar as xustas demandas da comunidade escolar, por iso pedimos o seu cese ou dimisión inmediata”.
