O alcalde de Ribeira, Manuel Ruiz, vén de participar na undécima e terceira edición respectivamente do foro Greencities e S-Moving, uns dos encontros nacionais de referencia no desenvolvemento de territorios intelixentes, sostibles, eficientes e conectados. O evento, que tivo lugar os días 29 e 30 de setembro reuniu a 1.560 visitantes.
Manuel Ruiz defendeu o papel das pequenas cidades, como Santa Uxía de Ribeira, no reparto dos fondos Next Generation, destinados a acadar unha mobilidade sostible e segura. O rexedor aposta polo emprego de vehículos eléctricos e o aluguer de bicicletas e patinetes para reducir a contaminación atmosférica, así como pola instalación
de electrolineiras urbanas.
Ruiz quixo facer referencia á EDUSI, cofinanciada con fondos FEDER, que se destinarán entre outras accións para lograr pasos de peóns máis seguros a través de solucións smart.
O alcalde falou dunha realidade que, máis que un futuro próximo, é un presente. Lembrou que Ribeira está integrada no Obxectivo 2030 dentro do pacto de alcaldes. Por último, Ruiz, salientou que as medidas na loita contra a pegada de carbono deberían estar fóra do debate político e fixo un chamamento a que tódolos alcaldes remasen na mesma dirección.
