O Concello da Pobra do Caramiñal vén de pór en marcha a terceira campaña de compostaxe doméstica que suporá o repartimento de 50 novos recipientes para residuos orgánicos. Con esta medida, dáse continuidade ao proxecto da compostaxe no municipio impulsado dende a Concellaría do Medio Ambiente, da cal é titular a edil Genoveva Hermo (Nós Pobra).
A adquisición desta terceira remesa está financiada cunha subvención de 13.630’63 euros da que resultou beneficiaria a Administración local, ao abeiro das axudas do Ministerio para a Transición Ecolóxica e o Reto Demográfico na convocatoria de Residuos 2020 (PIMA e PEMAR), que coas liñas de compostaxe pretende “reducir as emisións de gases de efecto invernadoiro (GEI) e mellorar na consecución do Plan Estatal Marco de Xestión de Residuos (PEMAR)”.
Medio Ambiente da Pobra informou que as persoas que desexen participar dispoñen ata finais de ano para formalizar a súa solicitude a través do rexistro, de xeito preferíbel por vía telemática.
Entre os requisitos figuran: vivir de forma habitual no concello da Pobra do Caramiñal; dispor dun terreo (xardín, horta) cunha superficie mínima de 25 metros cadrados; e permitir o seguimento da compostaxe, previa cita, unha vez que se facilite o material.
Cómpre indicar que xa se distribuíron polo termo municipal un total de 110 composteiros domésticos mediante as dúas campañas previas. A primeira estivo financiada coa convocatoria de Axudas Residuos 2019 PIMA Residuos e PEMAR do Ministerio para a Transición Ecolóxica e o Reto Demográfico; mentres que a segunda se atopaba ao abeiro da convocatoria da Orde de 5 de maio de 2020 pola que se establecen as bases reguladoras para a concesión de axudas a entidades locais de Galicia para o financiamento de actuacións en materia de residuos de competencia municipal, co-financiadas polo Fondo Europeo de Desenvolvemento Rexional con cargo ao programa operativo FEDER Galicia 2014-2020.