Latexo Percusión organiza este mércores unha aula aberta de batucada en Ribeira

Coincidindo co comezo do curso, Latexo Percusión está a preparar unha xornada en Ribeira para informar das súas aulas regulares e as súas actividades formativas de batucada. A cita será este mércores 22 de setembro a partir das 17.30 horas na explanada do porto. O obxectivo, segundo sinalan dende esta iniciativa de dinamización e formación musical, é “chamar a atención de todas aquelas persoas que poidan estar interesadas, ofrecendo información sobre a escola e o proxecto, así como un pequeno obradoiro aberto de batucada”.

As persoas que queiran achegarse terán a oportunidade de “saborear de primeira man a sensación de tocar dende cero algúns dos ritmos básicos da percusión afrobrasileira que se traballarán durante o curso, colgarse un dos instrumentos típicos deste estilo de música e desfrutar dun bo rato vivindo unha experiencia en grupo”.

As aulas comezarán en outubro e terán lugar na Sala La Real os mércores pola tarde, en distintos horarios: ás 17:00h, 18:30h e 20:00h. As prazas son limitadas e os grupos organizaranse en función das persoas inscritas. Máis información da xornada e inscricións na páxina web de Latexo e a través do correo electrónico latexopercusion@gmail.com.