Durante os días 3, 4 e 5 de setembro vaise celebrar en Silleda un dos grandes eventos gastronómicos do ámbito galego, estatal e peninsular: o Salón de Alimentación do Atlántico (SALIMAT), no marco da Semana Verde de Galicia. Neste gran escaparate do sector alimentario estarán presentes algunhas das principais empresas galegas deste ámbito de actividade, entre as que se conta Frigoríficos Mar da Pobra, emprazada no Polígono de Rianxo, que confirmou a súa presenza na feira. Amais, no salón daranse a coñecer 77 innovacións alimentarias e, en total, participarán 35 firmas expositoras.
Frigoríficos Mar da Pobra contará cun stand propio, deseñado cunha “proposta moi visual e orixinal onde as persoas que acudan poderán coñecer de primeira man tanto a filosofía da empresa coma o seu catálogo de produtos”, explican fontes da empresa rianxeira, engadindo que este ámbito expositivo dará acubillo tamén a “unha interesante proposta culinaria, xa que nun dos laterais do stand haberá imaxes con 3 receitas elaboradas por Eloy Cancela e Kike Piñeiro, do coñecido restaurante compostelán A Horta d’Obradoiro, a base dos produtos da firma rianxeira”.
