Este 17 de setembro temos unha cita en Porto do Son cos superpoderes. Será da man do actor Fran Rei, que ofrece na Casa da Cultura, ás 12.00 horas, o espectáculo familiar de humor Superheroe, abeirado ao programa Cultura no Camiño. Baixo dirección de Avelino González, é unha “comedia máxica” e fantástica de 50 minutos ideal para vermos en familia.
O argumento lévanos da man á vida de “Superheroe”, un personaxe que, en ausencia (por motivos laborais) de “Supernai”, deberá salvar a humanidade de terribles ameazas, sen esquecer a conciliación e plantando cara a perigosos axentes malignos mentres prepara as merendas, pon unha lavadora ou cambia un cueiro. “E todo”, explican Avelino González e Fran Rei, “no axustado tempo que lle deixa a apertada axenda de actividades extraescolares dos seus fillos”.
