Esta fin de semana organízase en Ribeira, no Complexo Deportivo da Fieiteira, o primeiro torneo de fútbol 8 organizado polo Concello, a Fundación Celta de Vigo e o Club de Fútbol Cidade de Ribeira. Nel participarán un total de oito equipos de fútbol base da canteira de Galicia. O sábado será a queda da categoría de benxamíns e, o domingo, da de alevíns.
Os partidos darán comezo ás 10.30 coa fase de grupos, as semifinais xogaranse a partir das 16.30, a loita polo 3º e 4º posto será ás 17:30 e as finais ás 18.00. Tódolos equipos xogarán un total de cinco partidos.
Na presentación da competición, celebrada na mañá deste 30 de setembro, a primeira tenente alcalde, María Sampedro, salientou “a aposta do Concello polo deporte, especialmente polo base, como xeito de que os rapaces compitan e aprendan valores”.
Pola súa banda, o edil de Deportes, Javier Sampedro manifestou o seu desexo de que se unan máis clubs en vindeiras edicións.
Desde o C.F. Cidade De Ribeira agardan que este evento, xunto co Torneo Copa Sálvora, se consolide como unha competición de referencia na comarca, segundo afirmou o seu vicepresidente Ramón Martínez.
Os partidos constarán dun tempo de 25 minutos agás as finais, que durarán 30. Tódolos equipos participantes recibirán un agasallo e haberá un trofeo para cada equipo gañador. A competición disputarase seguindo cos protocolos de prevención de COVID. Os partidos xogaranse no campo de céspede natural do Complexo Deportivo Municipal da Fieiteira. En caso de climatoloxía adversa pasaranse ó campo sintético anexo.
Equipos:
GRUPO A
- Real Club Deportivo de La Coruña
- C.D. Conxo Santiago
- E.D. Val Miñor
- S.D. Xuventú Aguiño
GRUPO B
- Real Club Celta de Vigo
- Bertamiráns F.C.
- E.D. Xuventude Oroso
- Cidade de Ribeira C.F
