A Policía Autonómica detivo a J. M. B., alias “O Chosco”, de 51 anos, patriarca do poboado da Onlleira, acusado dun delito de incendio forestal e, tras a práctica de dilixencias, deixouno en liberdade.
Segundo informa o Diario de Arousa, os feitos que se lle atribúen rexistráronse na tarde do pasado martes no lugar ribeirense de Xarás, nun terreo situado entre as estradas de Carreira por Frións e da Avenida de Ferrol, e que calcinou unha superficie total de 0,34 hectáreas, 3.000 metros cadrados dunha superficie rexenerada fai tres anos con eucaliptos e outros 400 de matogueira, segundo confirmou entón a Consellería do Medio Rural e informamos en “O Barbanza”.
O lume declarouse na parte posterior da nave de Recambios Andrés, deténdose as chamas na súa parede posterior, así como no peche dunha vivenda próxima e seguidamente dirixiuse cara á Avenida de Ferrol, para logo volver tomar unha traxectoria ascendente. Nos labores de extinción mobilizáronse dous helicópteros, dous hidroavións, dous axentes forestais, cinco brigadas e catro motobombas, ademais do GAEM e os Bombeiros de Ribeira.
Ao parecer, tamén se investiga ao agora detido por incendidos habituais en horario nocturno en aveños amoreados nas inmediacións do referido poboado da Conlleira, como colchóns, coa finalidade de extraer os peiraos de ferro para posteriormente vendelo como chatarra. Os equipos de emerxencias e de extinción, así como a Policía Local, tiveron que intervir en varias noites durante o pasado mes de agosto por ese mesmo motivo.
