Trinta anos despois de que foran creadas, as 27 composicións que conforman a colección “Noir Blanc”, do noiés José Luis Veiras Manteiga, poden ser contempladas a través dunha exposición que permanecerá no Centro Cultural Lustres Rivas de Ribeira ata o vindeiro 9 de outubro.
Na noite de onte tivo lugar o acto inaugural, que baixo a presidencia da primeira tenente de alcalde, María Sampedro, contou tamén coas intervencións de Pastor Rodríguez como director do Museo do Gravado de Artes; o noiés Alfonso Costa, colega e amigo do autor; e este último. Tamén estivo presente a concelleira de Lousame (municipio onde reside o artista). Silvia Agrafojo e, entre o numeroso público (o maximo do aforo permitido), creadores como Manuel
Ayaso, Paco Casal ou Maralla.
Tras as palabras introdutorias do técnico municipal de Cultura Unai González, Pastor Rodríguez tomou a palabra para explicar que esta mostra vén ser unha continuación da retrospectiva sobre Veiras Manteiga que lle dedicou o museo de Artes recentemente. Alfonso Costa eloxiou a calidade dunha obra que “estaba aí escondida e que tiña que saír á luz” en tanto que o propio Veiras Manteiga manifestou que non estaba previsto exhibir esta exposición e que foi Pastor Rodríguez quen a descubriu na súa casa e propuxo a idea de mostrala ao público. O artista agradeceu ao Concello de Ribeira e á Fundación Museo de Artes que se materializara esa posibilidade.
Rematou a inauguración María Sampedro manifestando que todos nos temos que felicitar por ter a oportunidade de disfrutar de “Noir Blanc” e aplaudiu que tantas persoas de todas as idades tivesen interese en estar presentes no acto, para ben da cultura.
A mostra pode ser visitada de luns a venres de 10 a 14 e de 19 a 21 horas e os sábados de 11 a 14 horas. A entrada é gratuíta.
