En Outes o Concello mellora a seguridade na ponte do Requeixiño

O Concello de Outes segue adiante coa súa liña de traballo para mellorar infraestruturas e equipamentos, poñendo o foco na seguridade e na accesibilidade. Este precisamente foi o cometido dos labores levados a cabo na ponte do Requeixiño, na estrada que vai á praia de Broña, que vén de ser obxecto “dunha pequena pero importante actuación de seguridade viaria”, explicou o Concello, engadindo que os traballos remataron na semana que vimos de deixar atrás.

O obxectivo concreto das tarefas realizadas na ponte que cruza o río Bendimón foi o de mellorar a seguridade neste treito de estrada, tanto a relativa aos peóns como aos condutores, unha vía que ve aumentada cada ano a afluencia de tráfico por mor do atractivo turístico da praia de Broña, que é unha das máis próximas da nosa comarca a Santiago de Compostela.