O Concello de Boiro vén de comezar en Bermo o asfaltado de tres camiños rurais de acceso a parcelas agrícolas. A obra forma parte do proxecto para o pavimentado deste tipo de vías que se realiza con cargo ás axudas do plan 2021-2022 que concede a Axencia Galega de Desenvolvemento Rural (AGADER). O alcalde, José Ramón Romero, e o concelleiro de Urbanismo e Obras, Luis Ruiz, visitaron este xoves 30 o lugar onde se iniciou a execución das obras.
O importe total da actuación é de 49.523,57 euros e, con esta contía, vaise actuar en tres puntos do municipio que son dous camiños en Bermo, na parroquia de Boiro, e un en Pomar do Río, na parroquia de Cures. Trátase de vías rurais, que na actualidade se atopan nun estado deficiente. No primeiro dos camiños que se vai executar en Bermo, de 6295 metros lineais e de 5 metros de ancho. En Bermo vaise actuar noutro espazo de 648 metros lineais e en Pomar do Rio vaise actuar nun tramo de 351 metros lineais, de 3,5 metros de ancho.
As actuacións realízanse mediante unhas axudas da Axencia Galega de Desenvolvemento Rural (AGADER), correspondentes ao Plan de mellora de camiños municipais de acceso a parcelas agrícolas para facilitar o seu paso e tamén que ten como obxectivo mellorar a accesibilidade e interrelación entre pequenos núcleos do territorio rural.
