O Concello de Dodro convoca unha réplica do Premio Eusebio Lorenzo Baleirón, o “Mini
Premio Eusebio Lorenzo Baleirón: Concurso literario “Das viaxes e dos soños”, dirixida, neste caso, ao
alumnado da ESO. O certame toma o seu nome da obra que o poeta de Dodro publicou no ano 1985,
con só 23 anos, na que se narraban as historias de Brais e Anselmo, en cuxa última páxina decía así:
“Esta é a historia dun suceso non sei se pasado ou presente, non sei se soñado ou vivido. Esta é a
historia dun desexo expreso en palabras. Unha viaxe no interior dun neno e dun home que a súa
maneira son tódolos nenos e homes que coñezo, un camiño trazado pola neboa e a lembranza…
Estas son voces que falan por si mesmas, ninguén máis guiará o seu destino. Eles, coma nós, saben
que soñar sempre será necesario…”. Polo tanto este concurso ten como obxectivos: promover a
creación literaria, o uso da lingua galega e a creación artística entre a mocidade “que soña” como
diría o propio autor.
A participación no certame será individual, na modalidade de fotocreación ou de
videocreación literaria, pois o Concello entende que a linguaxe literaria debe adaptarse aos novos
soportes de comunicación cos que actualmente convive a mocidade. As obras presentadas estarán
en lingua galega e versarán sobre as viaxe e os soños.
O prazo de presentación dos traballos rematará o día 31 de novembro. As bases do premio
poden consultarse na web municipal: www.dodro.gal.
O premio consistirá nunha peza exclusiva do ceramista galego Nacho Porto e nun lote de
libros, a súa entrega realizarase no marco do acto oficial de entrega do XXXIV Premio de Poesía
Eusebio Lorenzo Baleirón, prevista para o 11 de decembro no CPI Eusebio Lorenzo Baleirón.
