A Deputación da Coruña e o Concello de Muros veñen de xuntar forzas para optimizar a rede de saneamento no Camiño Real, na parroquia muradá de Serres, e acondicionar o estacionamento público da rúa do Cabo, en Muros. As actuacións atópanse en fase de licitación ata o vindeiro 23 de setembro e contarán cun orzamento de 217.926 euros, con cargo ao Plan Único provincial.
Os traballos previstos inclúen a construción dunha rede separativa de augas residuais a través da instalación dunha tubaxe para a recollida de pluviais e outra de fecais no lugar de Baño, en Serres. Segundo informou a Deputación, permitirán ofrecer un mellor servizo á veciñanza da contorna e, ao mesmo tempo, suporá un beneficio para o medio ambiente, “xa que na actualidade o saneamento verte indirectamente á ría, co conseguinte impacto nunha zona moi sensíbel na que se desenvolven tarefas de marisqueo”.
A iniciativa inclúe a instalación de pozos de rexistro e sumidoiros e a reposición do firme da estrada, coa correspondente pavimentación e nova sinalización horizontal e vertical. Os labores contan cun presuposto de 172.910 euros, dos que a Deputación achega o 85,6 % (148.086 euros) e o Concello o restante.
O Plan Único tamén dedica un total de 45.016 euros, financiados ao 100% pola Deputación, ao acondicionamento do aparcadoiro público na Rúa do Cabo, en Muros. Os traballos, segundo explica a entidade provincial, “permitirán facer deste espazo un lugar máis seguro e funcional a través da reposición do pavimento do espazo con firme bituminoso, a retirada do material inestable dun noiro en mal estado ao fondo da parcela e o acondicionamento do lindeiro dereito do lugar”. Crearanse dous pozos con resalto e dúas tubaxes paralelas para a recollida de pluviais e fecais. Así mesmo, instalaranse xardineiras de granito e un muro de mampostería tras elas cunha altura próxima aos dous metros. O prazo de execución das tarefas é de tres meses.