Cultura de Noia retoma o obradoiro municipal de teatro

Logo da interrupción motivada pola pandemia, a Concellería de Cultura de Noia que dirixe José Pérez retoma neste comezo do outono a actividade do obradoiro municipal de teatro. Con Iria Acevedo como profesora, as clases volverán o 2 de novembro, estando aberto o prazo de inscrición até o 11 de outubro no rexistro do Concello (debendo levar a ficha cumprimentada que poderemos descargar en liña).

Será un obradoiro para todas as idades, e de feito achegaranse tres modalidades: unha categoría infantil, unha segunda xuvenil e outra para adultos. “Co teatro”, sinalou o concelleiro de Cultura, “queremos capacitar e motivar ao alumnado para a participación dentro da comunidade e fomentar o desenvolvemento global das persoas na súa formación intelectual e no crecemento afectivo e social”.