O mozo Bruno Iglesias, regatista do Club Náutico Deportivo de Ribeira, proclamouse este fin de semana vencedor do Trofeo Xacobeo 2021, primeira proba puntuábel da nova tempada de Optimist, que se disputaba en augas de Sanxenxo cun total de 138 participantes.
Segundo informou o Náutico de Ribeira, Iglesias non só venceu na súa categoría, a Sub13 senón tamén na absoluta, Sub16, impóndose a Fernando González del Castillo e Andrés Gago, ambos do Real Club Náutico da Coruña.
Mentres, na categoría feminina Natalia Domínguez (RCN Sanxenxo) impúxose a Inés Ameneiro (RCN Vigo).
Cun total de 6 mangas disputadas, o máximo previsto, Iglesias mostrou a súa polivalencia, logrando mandar na clasificación tanto o primeiro día, con ventos frouxos, como tamén na segunda das xornadas, con vento forte do suroeste e mar de fondo.
En canto ao resto do equipo, o Náutico de Ribeira salientou “o bo facer de todo o grupo”, logrando meter até 3 deportistas entre os 15 primeiros da xeral absoluta.
Por outra banda, as mozas Olivia Sampedro, Nerea Suárez e Carolina Cadavid fixeron a súa primeira regata como membros da Escola de Vela Ramiro Carregal Rey.
