Con motivo da celebración deste 13 de setembro, cabodano de Filgueira Valverde, o Consello da Cultura Galega puxo en marcha o proxecto de dixitalización e recuperación documental Voces centenarias, unha nova iniciativa do CCG destinada a poñer en valor o noso patrimonio cultural e, en concreto, permitíndonos escoitar gravacións das persoas sobranceiras (da cultura, da política, da emigración) da nosa cultura a través da web da institución.
Coa voz de Filgueira Valverde, xunto coa do escritor rianxeiro Rafael Dieste e a da xornalista e actriz galego-arxentina Maruxa Boga, o Consello da Cultura Galega (CCG) bota a andar unha proposta que “peneira no fondo inédito que custodia o Arquivo Sonoro de Galicia (ASG) para ofrecer mensualmente unha escolma das súas gravacións sonoras”. Ás devanditas voces engadiranse en breve as de Valentín Paz-Andrade, Ramón Suárez Picallo, Ramón Otero Pedrayo, Fernando Iglesias “Tacholas” e moitos outros a través dos que podemos coñecer a contribución de cada un dos nosos intelectuais nos distintos eidos do coñecemento ou da política, do uso da lingua galega alén mar nos anos 50; ou a presenza da poesía e o teatro na emigración.
O Arquivo Sonoro de Galicia foi creado en 1992 co propósito de contribuír á recuperación do patrimonio sonoro galego e aglutinar en Galicia as distintas iniciativas que traballan co mesmo afán. A recompilación, a preservación máis a catalogación e a difusión son os aspectos principais deste centro, que conta con fondos editados e fondos inéditos. Actualmente está dirixido por Xosé Ramón Pousa e ten entre os seus membros a Rafael Cid, Concha Losada, Xulia Feixoo, Mónica Rebolo, Xerardo Dasairas Valsa e Cristina Pujales.