A Sala Arcos Moldes Auditorio de Rianxo vainos deparar unha cita co mellor teatro galego nesta recta final do verán. Será da man do grupo de teatro Airiños, en dúas quendas: o sábado 25 (20.30 h) e o domingo 26 (19.00 h) de setembro. A histórica compañía de Asados (foi posta en marcha alá polo ano 1933) achegará dúas funcións de Cataturxia, cata de textos breves do teatro galego contemporáneo.
Abordaranse pezas dalgunhas das principais figuras da nova dramaturxia galega: Xosé Prieto, Avelina Pérez, Ana Carreira, Amantia Coello, Roi Vilar Ponte e Carlos Labraña.
A entrada ten un custe de 3 € (a pagar no momento de acceder á función) e para reservala cómpre enviar unha mensaxe de correo electrónico á conta entradasairinhos@gmail.com (máximo 6 entradas por persoa). Máis información no sitio web do Concello de Rianxo.
