En Outes e contorna a Garda Civil e o Concello veñen de lanzar un aviso sobre diversas tentativas de estafa que se están a rexistrar nos últimos días nos concellos de Outes e de Mazaricos. A tentativa de calote consiste nunha chamada dende números de teléfono de Londres (prefixos +44 ou 0044) e nestas comunicacións o estafador, facéndose pasar por traballador de Windows ou Microsoft, pide que accedamos ao noso ordenador e que fagamos unha serie de comprobacións ou instalemos algún programa, coa escusa de que detectaron nel un virus ou algún outro tipo de problema.
Segundo advirte a Garda Civil, o que realmente se busca con estas chamadas é acceder ao noso computador a través do programa instalado e executado e, a partir de aí, roubar claves, datos bancarios ou pedir cartos pola suposta reparación.