O Concello de Rianxo presentou a oferta deportiva para a tempada de inverno 2021/2, incluíndo as actividades organizadas de xeito directo polo Servizo de Deportes, as escolas de formación dos clubs cos que colabora o Concello (programa deporte base) e as propostas da Piscina Municipal.
“É unha oferta adaptada, marcada polas restricións e as medidas de prevención para garantir a seguridade na práctica deportiva”, explicaron fontes do Concello, engadindo que se puxo o foco en ofrecer actividades e modalidades deportivas de carácter individual ou colectivas sen contacto físico. Deste xeito, a idea foi compensar a redución da oferta impulsando accións para un amplo rango da poboación e cun carácter descentralizado, con propostas en todas as parroquias rianxeiras e co obxectivo de “achegar o deporte a todos/as”, en especial a aquelas persoas que mais dificultades teñen de mobilidade (crianzas e terceira idade).
Haberá límite de prazas en todos grupos.
Ás actividades para a rapazada son modalidades deportivas ás que se pode acceder nos pavillóns municipais (3 escolas deportivas: tenis, patinaxe, tenis de mesa/bádminton), na Piscina Municipal e a través das escolas de formación dos clubs rianxeiros (8 modalidades: tríatlon (novidade), piragüismo, remo, baloncesto, xadrez, voleibol e fútbol).
En canto ás actividades para adultos e terceira idade, poderán escoller entre 20 propostas distintas, que van desde o multifitness e o tenis nos pavillóns municipais a unha ampla oferta de actividades acuáticas (pool dance, pool salus…) e dirixidas (cross, pilates, step, hipopresivos…) na Piscina Municipal.
Asemade, mantéñense os grupos de ximnasia para a terceira idade en todas as parroquias do concello.
O prazo de inscrición abriu o 22 de setembro e as actividades darán comezo o 4 de
outubro.
Máis información e inscricións no Servizo de Deportes e nos Pavillóns Municipais.
