Presidida polo arcebispo metropolitano, Monseñor Xulián Barrio Barrio, a tarde deste sábado tivo lugar no porto de Ribeira a tradicional misa ao aire libre na honra da Virxe do Carme coa que todos os anos a veciñanza da cidade quere render tributo á patroa da xente do mar: unha cerimonia que por segundo ano consecutivo tivo lugar baixo a aplicación de medidas anticovid pero que malia as limitacións que isto conleva o pobo volveu responder masivamente.
A celebración, na que tamén estaba o cura da parroquia de Santa Uxía, Alfonso Mera, contou entre outras autoridades coa presenza da conselleira do Mar, Rosa Quintana; o alcalde Manuel Ruiz; os patróns maiores de Ribeira e Aguiño, edís da Corporación, capitán marítimo de Vilagarcía, representantes das forzas vivas do municipio, etc…
Unha vez máis, integrantes das Alfaia e Amas de Casa luciron traxe negro e mantilla. Contou coas intervencións musicais da Coral Polifónica Municipal de Ribeira e da Banda de Música do Cristo da Buena Muerte de Ferrol, en tanto que Ange-Patrick Duhy cantou varios temas coa súa portentosa voz.
Concluída a Eucaristía, o arcepisbo, o cura párroco e o patrón maior de Ribeira embarcaron para facer unha ofrenda floral ás vítimas do mar e, unha vez regresado, emprendeuse unha procesión ata a igrexa de Santa Uxía con paso por diante da Residencia de Maiores.
