O Concello de Ribeira fará un recibimento popular á deportista olímpica local Ana Peleteiro Brión, que chega dos xogos de Toquio logo de ter conseguido un dos grandes fitos da súa frutífera e exitosa carreira: a medalla de bronce en triplo salto. Este logro converteu a Peleteiro na primeira medalla olímpica na historia do municipio sendo ademais a segunda deportista que participa nuns xogos tras María Vilas Vidal en Río 2016.
O acto popular terá lugar este sábado 14 de agosto ás 21.30 horas na Praza de España que estará acoutada e ocupada con cadeiras en cumprimento do protocolo anti-COVID.
A apertura terá lugar media hora antes.
Cómpre lembrar que Ana Peleteiro Brión xa fora distinguida coa medalla de ouro de Ribeira cadrando coa festividade de Santa Uxía do ano 2012 (nun acto no que tamén foi galardoada a citada María Vilas, en tanto que outro futuro olimpista, Álex Vidal, recibiuna o pasado mércores) e que por decisión da Corporación a atleta será nomeada filla predilecta.
