Ribeira conta cun moderno vehículo policial para o control de aparcamentos e outras utilidades

O entorno da praza do Concello foi o escenario elixido para dar a coñecer a última das adquisicións do parque móbil da Policía Local: un vehículo modelo Seat Ateca que incorpora as últimas novidades tecnolóxicas para o control de zonas de aparcamento ou de acceso a vías peonís a través dun moderno sistema de lectura de matrículas denominado Atenea.
Así, de acordo co explicado por Luis Cespón, delegado da empresa Federal Signal Vama, o vehículo conta con catro cámaras coas que controlar áreas de estacionamento de distintas tipoloxías, tales como zonas azuis, carga e descarga ou aparcamentos express; así como detectar se un vehículo foi roubado e outras posibilidades. Tamén pode gravar e xestionar infraccións de tráfico e incluso conta cun sistema de vidogravación cando se introduce un detido para o seu
traslado.
O vehículo foi adquirido a Autos Iglesias baixo a modalidade de renting, de tal xeito que pasados catro anos pasará a ser propiedade do Concello.
O alcalde Manuel Ruiz explicou durante a presentación que esta nova incorporación (a forza ribeirense xa conta con outro equipo Atenea instalado noutro vehículo) vai permitir rebaixar tarefas a efectivos da Policía Local e que poidan dedicarse a outro tipo de labores que demanda a poboación. Tamén avanzou que se van a incorporar á plantilla catro auxiliares e se van convocar cinco novas prazas de axente.
Por último, informou de que o Concello está estudando seguir incrementando o parque móbil da Policía a través dunha liña de financiación para vehículos eléctricos.