Regata Mar de Finisterre-Trofeo Pitusa Sabín do Real Club Náutico Portosín

O comodoro do Real de Portosín convida os armadores a navegar na regata máis emblemática do club

Foto: Juan Caballero

A menos dunha semana do Top de saída á XXXIII Regata Mar de #Finisterre – VII Trofeo Pitusa Sabín, a mariña deportiva do Real Club Náutico Portosín experimenta unha incesante actividade debido á chegada de veleiros que tomarán parte na regata máis emblemática do club.
Entre a frota destaca a confirmación de dúas especiais unidades, o barco da Comisión de Regatas de Ferrol da Armada Española, o Mirfak, vixente campión galego de Cruceiros ORC 0-1. O veleiro navegado á cana por Diego López vén defender o seu actual liderado no Trofeo Presidente Xunta de Galicia.
Tamén confirmou a súa participación o tamén campión galego de Cruceiros ORC 2-3, o Raygrass III, de José Antonio Núñez, barco que navega baixo a grímpola do Carrumeiro, e que é líder do Trofeo Presidente na súa División.
Outra das posibles unidades que manifestaron a súa intención de participar na gran cita velística é o Bosch Service Solutions, armado por Sailway e patroneado por Ramón Ojea. O veleiro do Club Marítimo de Canido vén de gañar a súa División dos ORC 3 na recente Regata Rías Baixas – Mar de Maeloc.
A iso hai que sumarlle destacadas embarcacións que navegan habitualmente na comarca do Barbanza, como o Arroutado, o Corsario, o Siradella, o Piko Norte ou o Entropía, entre moitos outros.

O comodoro do Real Club Náutico Portosín, Fernando González, facía as seguintes valoracións convidando, ao mesmo tempo, a navegar aos armadores na Mar de #Finisterre – Trofeo Pitusa Sabín.
“Para o RCN Portosín, o feito de que neste 2021, Ano Xacobeo, concedéronnos, por delegación do RCN Sanxenxo, que a proba máis antiga e emblemática pase a formar parte do Trofeo Presidente Xunta de Galicia, conxuntamente co Trofeo Infanta Elena, do RCN A Coruña, e o Trofeo Príncipe de Asturias, do MRCYB, é unha oportunidade para estar o top da vela de cruceiro e demostrar que somos capaces de facer unha gran regata e facelo a plena satisfacción de todos os barcos que navegan neste circuíto”, comenta.
“E supón tamén a culminación dun traballo que desde hai máis de 30 anos vén realizando con esta regata. A Mar de #Finisterre – Trofeo Pitusa Sabín foi a primeira regata que naceu no noso club, navegando as augas da nosa contorna, cunha beleza paisaxística extraordinaria e un campo de regatas inigualable”, continuaba explicando o comodoro.
“Eu, desde aquí, quería convidar a toda a frota que non tivese a oportunidade de vir navegar a esta regata, que se anime, é unha experiencia extraordinaria. Imos tentar por todos o medios que sexa unha regata que lembren con moito agarimo e que sexa a primeira de moitas edicións”, terminaba dicindo González.