A Consellería de Política Social da Xunta que dirixe a ribeirense Fabiola García fixo balance da súa actividade recente en materia de inclusión de persoas en risco. En total, impartíronse 89 cursos de integración neste primeiro semestre de ano, o que equivale a case 2.700 horas de formación en 50 concellos de Galicia. Ao remate destas accións, obtiveron o diploma 757 alumnas e alumnos, 398 homes e 359 mulleres.
Estas accións formativas desenvolvéronse a través da rede de equipos comarcais de inclusión sociolaboral do Consorcio Galego de Servizos de Igualdade e Benestar e estiveron financiadas nun 80% polo Fondo Social Europeo no marco do Programa Operativo FSE Galicia 2014-2020.
O xerente do Consorcio, Perfecto Rodríguez, salientou que “con esta proposta melloramos as oportunidades laborais de persoas que atravesan unha situación complicada e teñen moi difícil acceso a este tipo de formación por diferentes causas, como carecer da titulación académica necesaria, ter dificultades de desprazamento ou de dispoñibilidade horaria, ou porque a oferta formativa onde residen é limitada”.
